Чосон дәуіріндегі ер адамдар сонбидің бойынан алты басты ізгі қасиет табылу керек деп есептеген, олар: әдептілік қағидалары, көркем жазу, математикалық қабілет, музыкалық аспапта ойнау, садақ ату, атқа міну. Ер-азаматтар отбасының абыройын асқақтату мен мансаптың жемісті болуы үшін тоқтаусыз ғылыммен айналысып қана қоймай, табиғатқа да етене жақын болып, аракідік садақ ату мен жауынгерлік өнерін жетілдіріп, жан мен тәнді қатар шынықтыра білді. Бұл замандағы ерлердің сүйікті істері өлең оқу немесе комунго мен сыбызғы секілді музыкалық аспапта ойнау болды.